काम करथिन उनके मिलतई जाॅब कार्ड

viswजिला शिवहर, प्रखण्ड तरियानी, गांव कस्तुरिया, वार्ड नम्बर तेरह। उहां के लोग कहलथिन कि हमरा सब के मनरेगा के तहत काम न मिल रहल हय, न जाॅब कार्ड बनल हय।
इहां के रमण कुम्हार, राजिन्द्र कुमार, कमली देवी, जोगी देवी कहलथिन कि हमर सब के पिछला कार्ड पर चार से पांच दिन काम मिलल। ओकरा बाद ओईसही रह गेल। अभी नया में कार्ड बनलईय लेकिन काम भी मिलईत त कुछ रोजी-रोटी चलईत। लेकिन ऐई योजना के कोई लाभ न हय।
मुखिया नाजो खातून के पति अमीन अंसारी कहलथिन कि लोग अगर काम मंगथिन तब न उनका देल जतई। दोसर में जे मिट्टी भराई में काम करई छथिन त उ अपना मन से ऐनी-ओनी करईत दिन काटे लगई छथिन। हमर सब के त ओई में बेसी रूपईया लग जाई छई अउर काम भी न हो पवई छई।
कार्यक्रम पदाधिकारी अजय सहाय कहलथिन कि अभी जे नया कार्ड बनलईय उ ऐई हिसाब से बनायल जाई छई जे उपयोग हो सके। जे लोग काम के मांग करथिन उनकरे कार्ड बनतई। दोसर अगर उ काम करे के इच्छुक छथिन उ आवेदन देथिन त उनका पंद्रह दिन के भीतर में काम देल जतई।