कहिया आ जतई रूपईया

लाभ से वंचित महिला
लाभ से वंचित महिला

जिला सीतामढ़ी, प्रखण्ड रीगा, पंचायत सिरौली प्रथम, गांव हनुमाननगर। उहां इंदू कुमारी, वीणा कुमारी के शादी 2011 के अषाढ़ महिना में भेलई। चार साल से मुख्यमंत्री कन्या विवाह योजना के तहत आवेदन प्रखण्ड में जमा होयल हई। लेकिन रूपईया कब मिलतई।
उहां के जयलस देवी, राजो देवी, कहलथिन कि हम सब अपना बेटी के शादी के आवेदन एक महिना के अन्दर में जमा कईली। लेकिन आई ले कोई सूचना न हई। केतना बेर हम प्रखण्ड में चक्कर लगईली लेकिन कोई सही जानकारी न दे रहल छथिन। सरकार गरीब लोग के लेल मुख्यमंत्री कन्या विवाह योजना के लागू कलथिन कि लड़की के शादी में रूपईया से कुछ सहयोग हो जतई। लेकिन लाभ समय पर न मिल पवई छई।
मुखिया पवन कुमार कहलथिन कि हम उनका सब के आवेदन स्वीकृत करके प्रखण्ड में जमा करवा देली, उ काम किरानी करथिन। किरानी प्रकाश झा कहलथिन कि जेतना लोग के आवेदन पास होयल रहलई, उ लोग के चेक मिल गेलई। लेकिन आवेदन करे वाला लोग ज्यादा होई छथिन अउर योजना से रूपईया कम अबई छई तही हिसाब से बितरण कयल जाई छई। जिला से रूपईया अतई त उनका सब के चेक के माध्यम से वितारण कयल जतई।