कभे सुधरहे सड़कन की हालत

जिला महोबा, ब्लाक चरखारी, गांव इमिलिया डांग ओर सोहजना।  ईं गांवन के सड़कन की हालत बोहतई खराब हे। आदमी एक दइयां से दोबारा गांव जायें को नाम नई लेत हे। जीखे बनवायें के लाने प्रधान से लेके जिला तक के अधिकारियन के कान में बनवायें के लाने जूं तक नई नेगत हें।
इमिलिया डांग के मोहनलाल, मानबहादुर, मुलायम सिंह ओर जंगबहादुर कहत हे कि ई सड़क की लम्बाई लगभग आधा किलोमीटर हे। जोन बीस साल से  खराब परी हे। हम लोग निकर नईं पाउत हे। न द्वारे से हमाओ साधन, बैलगाड़ी निकर पाउत हे। खोपड़ी में धर के समान ले जाने परत हे।
प्रधान प्यारेलाल कहत हे की मोये एते इत्तो बजट नईयां की गांव की रास्ता बनवा सको।
एसई गांव सोहजना के सुक्का, पप्पू, धर्मा मदन अहिरवार ओर झगड़ू अहिरवार कहत हे कि गांव में दो सी.सी. रोड बने हे। पूरे गांव में गिलाव भरो रहत हे। हम लोग बरसात में अपने घर से निकरें खा तरसत हे। पे सड़क बनवायें के लाने कोनऊ नई सुनत हे। हम सोचत हते की प्रधान हमाये एते भी सी.सी. रोड बनवा देहे। हमाई तो ठीक हे हमाये बच्चन तक की उमर गुजर जेहे पे सड़कन की हालत न सुधरहे।