कब्जा कइके देत धमकी

DSCN1269जिला बांदा, कस्बा बबेरू, मोहल्ला अम्बेड़कर नगर। या मोहल्ला के पचासन मड़ई 21 अक्टूबर 2014 का बबेरू तहसील मा दरखास दइके कब्जा हटवावैं के मांग करिन। मड़इन का आरोप रहैं कि मोहल्ला का मुन्ना सिंह सार्वजनिक जघा मा कब्जा कइके मड़इन का जान से मारैं के धमकी देत है।
कुसुमा, लक्ष्मीनिया, रानी अउर कुरैशा कहिन-“मोहल्ला मा हमीरिया नाम का तालाब है। 7 अक्टूबर से तालाब मा मुन्ना सिंह आपन जमीन बता के कटीली तार से चारौ कइत से घेर लिहिस। वहिके साथै सरकारी खड़ण्जा, पाइप लाइन अउर बिजली के खम्भा भी घेर लिहिस। मुहर्रम का समय है। तालाब के बगल मा बने कर्बला का रास्ता भी बंद होइगा है। अगर कउनौ मड़ई मुन्ना सिंह से या बारे मा एक बात भी करत है तौ गाली गलौज करत है। दिन दहाड़े गोली से मार दें के बात करत है। इनतान मा गम्भीर विवाद होय का डर है, पै दरखास दें के बाद भी कउनौ कारवाही नहीं भे आय।”
मुन्ना सिंह का भाई सोनू सिंह कहिस कि हमार जमीन मा तालाब है। या मारे आपन जमीन घेर लीन है। बाकी सार्वजनिक जघा का घेराव का आरोप गलत है।
नायब तहसीलदार दिलीप कुमार कहिन कि हमीरिया तालाब के बगल से मुन्ना सिंह के भूमि धरी जमीन है। अबै या मामला मा जांच चलत है।