कन्या विद्या धन का चेक मिलै के बाद नहीं मिला रूपिया

DSC09001
कन्या विद्या धन के करत मांग

जिला चित्रकूट, ब्लाक रामनगर, कस्बा राजापुर। हिंया के निधि गुप्ता बताइस कि कक्षा बारह मा धीरेन्द्र इन्टर कालेज मा पढ़त रहै। तबै कन्या विद्या धन का चेक मुख्यमंत्री अखिलेश सिंह सबै बिटियन का सीतापुर के रामायण मेला मा तीस हजार रूपिया का चेक दिहिन रहै। जबै मोहिका भी मिला रहै। तबै से अबै तक रूपिया नहीं मिला आय।
निधि गुप्ता बताइस कि छह महीना इलाहाबाद के बैंक वाले भरोसा दिहिन हवै कि रूपिया मिल जई। यहिके बाद चेक लउटा दिहिन हवैं। कहिन कि सरकार रूपिया नहीं भेजावत तौ हम कहां से देई। इनतान कहिके चेक लउटा दिहिन हवै। या कारन मैं डी.आर.एस. आफिस मा 15 मई 2013 का चेक जमा करा हवै अबै तक कउनौ पता नहीं चला आय। मोर परिवार मा बाप प्रेमचन्द्र गुप्ता नौ बरस पहिले जीप के टक्कर से खतम होइगा रहै। कउनौ आवै जाये वाला नहीं आय कि कछौ मदद करै। सरकार कइती से जउन रूपिया मिला वा भी हाथ नहीं आवा आय।
डी.आर.एस. आफिस के लिपिक राजेश का कहब हवै कि कन्या विद्या धन के पैंतिस चेक लउट आय  हवै। उनके लिस्ट बना के सरकार का दीन गे हवै। जबै बजट पास होइ तौ रूपिया दीन जई। कहे से अबै सरकार के लगे बजट नहीं आय।