कच्चा चकरोट कै हुअत बच्चों की शिक्षा पै असर

gaow1 fainal
कच्ची सड़क मा भरा पानी

जिला फैजाबाद, ब्लाक मया, काजीपुर गाडर पूर्व माध्यमिक विद्यालय अउर प्राथमिक विद्यालय। यहि स्कूल के तरफ जवन कच्चा रास्ता बाय वहपै बारिस के वजह से चहटा होय जा थै। लगभग पैंतिस साल से ई स्कूल चलत बाय लकिन अबहीं तक खड़न्जा नाय बना।
हिंआ कै गेदहरै पुष्पा, रंजीत, रोहित बताइन कि जब पानी बरस जाथै तौ हमरे सब वही चहटा मा हलिके आई थी तौ पानी मा गिर जाई थी। ड्रेस अउर बैग सब भीग जा थै। कहियौ-कहियौ हमरे सबकै पूरे दिन कै पढ़ाई खराब होय जा थै। काहे कि वापिस घरे जाय का परा थै।
प्राथमिक विद्यालय कै हेडमास्टर गीता वर्मा अउर पूर्व माध्यमिक विद्यालय कै हेडमास्टर रामजानकी वर्मा बताइन कि हमरे हिंआ रास्ता का लइके बहुतै दिक्कत बाय। हम सब आपन साधन सड़क पै खड़ा कै दी थी। यहि कीचा से हलिके आवै जाय का परा थै कइयौ बार प्रधान से खड़न्जा लगुवावै ताई कहि जाय चुका बाय तबौ दुई साल भै खाली माटी पटाय दिहे अहैं। वनुवावै कै नावे निषान नाय बाय।
प्रधान सुरजी देवी बताइन कि हम मनरेगा के माध्यम से माटी डरवाय देहे हई लकिन खड़न्जा कै लम्बाई लगभग ढाई तीन किलोमीटर बाय। ई हमरे कोटा से नाय, विधायक के कोटा से खड़न्जा या सड़क बने।