एक अध्यापिका से चल रहा है फैजाबाद जिला के तारुन ब्लॉक का प्राथमिक स्कूल

जिला फैजाबाद, ब्लाक तारून के धमहर प्राथमिक विद्यालय मा सिर्फ दुई अध्यापक अहैं।जेहमा से एक अध्यापक स्वास्थय ठीक न हुवे से छुट्टी पै बाटिन।अब एक अध्यापिका के सहारे विद्यालय चलत बाय।गेदहरन कै पढ़ाई नाय होय पावत बाय। अभिभावक कै मांग बाय की अध्यापक कै भर्ती कीन जाय। लकिन उनकै मांग अनसुनी कीन जात बाय।
आलोक कुमार पार्थ कै कहब बाय कि हम पाचवीं क्लास मा पढ़ी थी। हर विषय पढ़ावा जाथै। कबहू कबहू एक साथ सबका बैठाय के पढ़ावाथिन।
पूनम मिश्रा सहायक अध्यापिका कै कहब बाय कि हम एक से पांच तक के गेदहरन का पढ़ाई थी।तीन टीचर रहेन लकिन प्रधानाध्यापक कै अगस्त महीना मा ट्रांसफर होइगा तबसे दुई जने हई। अउर अब एक टीचर मेडिकल छुट्टी पै अहैं तब हम पूरा क्लास अकेले पढ़ाई थी। मौखिक रूप से मांग करे हई।
जिला बेसिक शिक्षा अधिकारी योगेन्द्र कुमार कै कहब बाय कि वहि स्कूल मा दुई टीचर अहैं एक मेडिकल छुट्टी पै बाटिन। साठ गेद्हरा बाटे। अगर पढ़ाई कै समस्या बाय तौ खंड शिक्षा अधिकारी का प्रार्थना पत्र देइके सूचित करै।वहि जवन भी उचित व्यवस्था होय पाये वै करिहैं। अगर वै नाय कै पावत अहैं तौ अध्यापिका सीधे हमसे बात कै सकै। हम शिक्षा व्यवस्था के ताई पूरा सहयोग करब।

रिपोर्टर- संगीता अउर प्रियंका

25/04/2017 को प्रकाशित