आवास, शौचालय, और अन्य मूल विकास सुविधाओं से बांदा का तिंदवारी मजरा जमनी पुरवा वंचित

जिला बांदा, ब्लाक बड़ोखर खुर्द गांव तिंदवारा, मजरा जमनी पुरवा सरकार चुनाव के समय तौ बहुतै वादा करत है पै हकीकत बिल्कुल अलग है। हेंया के मड़ई अबै तक शौचालय अउर आवास खातिर भटकत है। मेहरियन का सड़क किनारे टट्टी खातिर जाये का पड़त है। जेहिसे गुण्डा अउर दबंग का खतरा बना रहत है। कउनौ घटना होय के बाद प्रशासन सुनत नहीं आय। यहै कारन हेंया के मड़ई बहुतै परेशान है।
बिंदी बताइस कि हमरे गांव मा नयी नयी बहु आयी है तौ टट्टी खातिर सड़क किनारे जात है।सड़क मा बहुतै भीड़ रहत है तौ उंई दुई दुई घंटा खड़ी रहत है अउर वापस लउत आवत है। विजय करन बताइस कि हमे हेंया रहत दुई पीढ़ी होइ गे है पै आवास के सुविधा नहीं मिलत आय। हमार नाम आवास मा आवत है तौ प्रधान अउर सचिव हमसे घूस मांगत है।
विकलांग राम बाबू बताइस बरसात मा हमें सड़क के लगे पैदल जाये मा बहुतै परेशानी होत है। पै प्रधान हमें शौचालय नहीं देत आय। प्रधान भइया दीन वर्मा का कहब है कि मड़इन के खाता मा 6 हजार रुपिया भेज दीन गा है तौ गड्ढा खोद लीन है। पूरा 12 हजार रुपिया मिल जात है तौ मड़ई गड्ढा पूर के रुपिया खर्च कइ डालत है।
खण्ड विकास अधिकारी ब्रज किशोर कुशवाहा का कहब कि गड्ढा खोद जाये के बाद बाकी रुपिया पात्र मड़ईन के खाता मा रुपिया भेज दीन जात है।

रिपोर्टर- नाजनी रिजवी

Published on May 30, 2017