आने वाला है बांदा जिले का मशहूर कालिंजर मेला लेकिन व्यवस्था चौपट

जिला बांदा, ब्लाक नरैनी ,कस्बा कालिंजर। हेंया के ऐतिहासिक अउर मशहूर कालिंजर किला मा हर साल के जइसे या साल  भी कार्तिक पूर्णिमा का मेला लागी, जेहिमा लाखों मड़ई हेंया अइहैं। मेला लागे का दुई दिन बाकी  है पै अबै तक हेंया कउनौ व्यवस्था नहीं आय। मेला मा 2 नवम्बर  से मड़ई आवे लगिहैं, काहे से 4 नवम्बर का मेला है।पै व्यवस्था  के नाम मा पानी अउर बिजली के भी व्यवस्था नहीं आय। नरैनी के सड़क तो बहुतै जर्जर हालत मा है पै विभाग कुछौ ध्यान नहीं देत आय।
दुकानदार हरी राम बताइस कि मेला मंगलवार से शुरू है पै अबै सफाई शुरू नहीं आय। सुन्दर लाल का कहब है कि हेंया कउनौ अधिकारी नहीं आवत आहीं न कउनौ दुकानदार आवत आहीं। सड़क बने खातिर कइयौ दरकी मांग कीन गे है।प्रधान राम बहोरी कुशवाहा का कहब है कि पिछले साल सड़क का डामरीकरण करावा गा रहै या साल व्यवस्था नहीं आय। सांसद भैरों प्रसाद मिश्रा का कहब है कि कालिंजर खातिर आठ करोड़ सत्तर लाख रुपिया दीन गा है जल्दी उद्घाटन कीन जई।
पी.डब्ल्यू. के अधिषासी अभियंता अमर सिंह का कहब है कि सड़क बने का काम शुरू होइ गा रहै पै हाइवे बनावे खातिर बीच मा काम रुक गा रहै।मार्च तक सड़क का काम पूर होइ जई।

बाईलाइन-गीता देवी 

30/10/2017 को प्रकाशित