आज बांदा में उम्मीदवारों की उम्मीद पर लगी मुहर

26 नवम्बर का बांदा जिला मा मतदान रहै हेंया के मड़ई बड़े जोर-शोर के साथै वोट डालें आये हैं पै कुछ मड़इन का नाम गलत है तौ कुछ मड़इन के पर्ची नहीं मिलत आय जेहिसे हेंया के मड़इन का उत्साह कम होइगा है। बी.एल.ओ उमाशंकर यादव का कहब है कि हम मड़इन का जांच कइके निर्वाचन आयोग का भेजें हन अब या उनकर गलती आय कि सब मड़इन का पर्ची काहे नहीं मिली आय। दुई हजार मड़इन का पर्ची नहीं मिली या बात झूठ आय।
रुखसाना बेगम बताइस कि मोर नाम के पर्ची नहीं मिली आय। वोटर लिस्ट मा मोर नाम नहीं आय यहै कारन वोट नहीं डाले आहूं। मुन्ना खान बताइस कि निर्वाचन कार्ड लीनेहौं पै मोर वोटर लिस्ट मा नाम नहीं आय।यहिके पहिले मैं कइयौ दरकी वोट डाल चुके हौं ।हर दरकी मोर नाम रहत रहै या दरकी नाम नहीं आय। अनिलकुमार कहब है कि पर्ची नहीं मिली आय न मोर नाम आय तौ कसत वोट डालौ। नौसाद बताइस कि कम से कम दूई हजार मड़इन का नाम वोटर लिस्ट मा नहीं आय  कुछ मड़इन का नाम गलत है यहै कारन उंई वोट नहीं पावत आहीं। अगर यहिमा सुधार न होइ तौ यहिनतान वोट कटत रहिहैं। दीपक कुमार बताइस कि हमार मोहल्ला से कम से कम पचास वोट कटी हैं यहिसे हम बहुतै दुखी हन।सरकार के नियम के आधार मा हमै पर्ची काहे नहीं मिली हमें यहिकर जवाब चाही। उम्मीदवार अब्दुल रज्जाक बताइस कि पांच-पांच दस-दस घरन का छोड़ दीन गा है। उनकर पर्ची नहीं बनाई गें आहीं जेहिसे मड़ई परेशान होत हैं अउर मतदान भी कम होत है।
रिपोर्टर-खबर लहरिया ब्यूरो 

Published on Nov 26, 2017