आगी लगा के मार देय को आरोप

nbtजिला महोबा, ब्लाक कबरई, गांव कहरा। एते के 20 साल के ओरत की सिलोचना की मोत 21 नवम्बर खा हो गई हे। मायके वाले दहेज खा लेके मार देय को आरोप लगाउत हे।
सिलोचना को भाई अवधबिहारी कहत हे की 9 जून 2014 खा कहरा गांव में विक्रम के साथे करी हती। जीमें गाड़ी, अंगूठी, चैन ओर पचास हजार रुपइया दये हते। फिर भी ससुराल वाले नई मांने सिलोचना के साथे मारपीट करत हते। 21 हजार रुपइया ओर फ्रीज की मांग करत हते। बाप दयाराम कहत हे की मोय चार हे, मजदूरी करके परिवार पालत हों। एक लड़का ओर एक लड़की की शादी करने हे। हमने ससुराल वालेन की मांग नई पूरी करी तो बिटिया खा पेहले जान से मार दओ हे, ओर आगी लगा दई। काय से एक दिन पेहले ही छोट लड़का सिलोचना के एते से आओ हतो। दूसरे दिन पड़ोस के आदमियन ने फोन करके बताओ की सिलोचना मर गई हे।
आदमी विक्रम कहत हे की घर में कोनऊ नईं हतो। ऊने अपने से आगी लगाई हे। दहेज मगायें को झूठो आरोप लगाउत हे।
ब्लाक चरखारी, गांव सालट, एते के पार्वती की शादी 2011 में महोबा शहर में भई हती। जीखी मोत 20 अक्टूबर खा आगी लागे से हो गई हती। मायके वालेन को आरोप हे की दहेज कम मिले के करन मार दओ हे। आज तक रिपोर्ट नईं लिखी हे। न्याय के लाने 20 दिसम्बर खा एस.पी.खा दरखास दई हे
सुनील कुमार कहत हे की हम दोनऊ जने अकेले घर में रहत हते। कोनऊ बात नईं हती। ऊने अपने आगी लगाई हती।
महोबा सी.ओ. संदीप कुमार कहत हे की सालट गांव वाले केस की रिपोर्ट नई आई हे। अभे ब्यान ओर जांच चलत हे। जल्दी ही कारवाही करी जेहे।