आगी लगा के दई जान

M mahila mudda - Kabrai Thanaजिला महोबा, ब्लाक कबरई, गांव पिड़ारी। एते की बीस साल की ओरत शिवानी ने आगी लगा के आत्महत्या कर लई हे। जभे की मायके वाले दहेज प्रथा को मामला बताउत हे। ईखी सूचना कबरई थाना मे दई हे। पुलिस ने लास को पंचनामा भर पोस्टमार्टम खा भेज दओ हे।
शिवानी को बाप कन्धी बताउत हे की हम भेड़ी जलालपुर के रहे वाले हे। दो साल पेहले पिड़ारी गांव में पुष्पेन्द्र के साथे करी हती। दहेज मे मेंने अपनी हंसियत से ज्यादा दहेज दओ हतो। फिर भी हमेशा अन्शु के साथे ससुराल वाले मारपीट करत हते। जा बात अन्शु ने केऊ दइयां घर में बताओ हतो। हम गरीब होंय के कारन अपनी बिटिया खा समझा के ससुराल भेज देत हते। आरोप हे की 10 जनवरी खा ससुराल वालेन ने पहले मारपीट करी हे ओर फिर जला दओ हे। दहेज प्रथा को मुकदमा लिखायें के लाने कबरई थाना मे दरखास दई हे।
आदमी पुष्पेन्द्र सिंह कहत हे की मारपीट ओर दहेज को झूठो आरोप लगाउत हे। घर में कोनऊ न हतो। ऊने अपने से आगी लगाई हे। आगी लागें की सूचना हमें मोहल्ला के आदमियन न फोन से दई हती। कबरई थाना के एस.ओ. सुरेन्द्र कुमार कहत हे की सूचना मिली हती। जांच चलत हे। कोनऊतान की दरखास नई आई हे। अगर जांच में कछू पाओ जेहे तो मुकदमा लिख कारवाही करी जेहे।