आगी, रोजी रोटी मा देखाइस असर

sabji mandi copyजिला चित्रकूट, ब्लाॅक कर्वी के सब्जी मंडी मा 15 जून कें रात मा लगभग साढ़े दस बजे अचानक आगी लाग गे। आगी लागैं से सब्जी बेचैं वालेन का करोड़न रुपिया का नुकसान होइगा हवै। आगी लागैं के समय मउके मा कर्वी तहसीलदार,एस.डी.एम. अउर कर्वी कोतवाली के पुलिस पहुंची अउर लोगन का समझाइन हवैं।
सब्जी बेचैं वाले मोहममद हनीफ, रइस, जमाल, कमाल राजू, आजाद,रऊफ अउर नफीस का कहब हवै कि हमार एक लाख रुपिया के सब्जी अउर आम जल के राख होइगा हवै। पचास पचास कुंतल आम अउर पचास पचास बोरी प्याज रखी रहै। वा सबै जल गा हवै। डेढ़ साल पहिले भी यहिनतान सब्जी मंडी मा आगी लाग रहै। वहिका अबै तक मुआवजा नहीं मिला हवै। सब्जी बेंच के अपने परिवार वालेन का पेट भरत रहेन। अब सब्जी वाले भूखन रहैं के कगार मा पहुंच गें हन। काहे से कि जउन पूंजी हमरे लगे रहै वा सबै आम अउर प्याज मा लगा दीन गे रहै। यहिसे हमरे लगे अब मजूरी करैं के अलावा अउर कउनौ दूसर काम नहीं बचा आय। कर्वी मा दमकल विभाग होय के बादौ आगी बोझावैं वाली गाड़ी नहीं आई रहै। जबै तक मा गाड़ी आई रहै तबै तक मा आगी खूबै फइल गे रहै। यहिसे मड़ई खुदै आगी बोझाइन हवैं। अगर समय से आगी बोढावैं वाली मशीन आ जात तौ येत्ता नुकसान न होइ पावत।
कर्वी कानून गो गुलजार का कहब हवै कि कोषागार के तहत सब्जी वालेन का मुआवजा के मांग कीन गे हवै। अगर उनका मुआवजा अई तौ जरुर दीन जई।

रिपोर्टर – नाजनी रिजवी और सुनीता प्रजापति