आंधी मा गिरा घर, एक कै मउत

जिला अम्बेडकरनगर, ब्लाॅक कटेहरी, ग्रामसभा भरथुआ सरैया, गांव सरैया। हिंआ 7 जून 2016 का तेज आंधी पानी आवै से एक मड़ई नुमा घर गिर जाए से एक दुई साल के लड़िका कै मउत होइगै। महतारी घायल बाय।
गांव वालेन कै कहब बाय कि रामगोपाल वर्मा कै मेहरारु बत्तिस साल कै मंजू अपने घरमा खाना बनावत रहिन। तेज आंधी आवै से मड़ई अउर माटी कै दीवाल भरभराय के गिरगै। वही के नीचे महतारी बेटवा दबाय गइन। घर गिरै कै आवाज सुनिके मनई दौरिन तौ मंजू वही के नीचे दबान रहिन। दीवार कै माटी हटवायके मंजू का बाहर निकारागै। पूरी तरह से मंजू घायल होइगै रहिन। जब उनका बाहर निकालागै तौ मंजू बताइन कि हमार बेटवा समर भी वही के नीचे दबान बाय। समर का निकारके दुइनौ महतारी बेटवा का निजी साधन से जिला अस्पताल मा भर्ती करावागै। समर का डाक्टर मृत घोषित कै दिहिन। महतारी मंजू कै इलाज चलत बाय।
एस.डी.एम. सदर पंकज कै कहब बाय कि पीड़ित का आर्थिक मदद दिलवाय जाये।