अब तक न हई केन्द्र

आंगनवाड़ी केन्द्र के मांग करईत लोग
आंगनवाड़ी केन्द्र के मांग करईत लोग

जिला सीतामढ़ी, प्रखण्ड रीगा, पंचायत सिरौली प्रथम, गांव हनुमाननगर। उहां पर आंगनवाड़ी केन्द्र न हई। जेई कारण छोट बच्चा, किशोरी अउर गर्भवती महिला सरकारी सुविधा से वंचित छथिन। ऐई सुविधा के लेल उ लोग राह देख रहल छथिन।
उहां के आनंद लाल सिंह, दिपिया देवी, कुशमी देवी, मीना देवी लगभग बीस लोग कहलथिन कि जब से रीगा प्रखण्ड में समेकित बाल विकास परियोजना के तहत आंगनवाड़ी केन्द्र खुललई तब से ऐई गांव में न हई। आंगनवाड़ी में पढ़े वाला बच्चा पचासो हई। जेकर पढ़ाई के लेल कोई सुविधा न हई अउर गर्भवती महिला, किशोरी के कोई सरकारी सुविधा न मिल रहल हई। आशा हई त टीकाकरण होई छई।
मुखिया पवन कुमार कहलथिन कि इहां पहिले कोन कारण से आंगनवाड़ी न खुललई एकर जानकारी हमरा पास न हय। अब आवेदन जमा करायल गेलई।
समेकित बाल विकास परियोजना के पदाधिकारी अंजू कुमारी कहलथिन कि आवेदन जमा करायल गेल हई, चयनित करे के लेल जिला से चिठ्ठी अतई तब उहां सेविका सहायिका चयन कयल जतई।