अपात्र मालामाल, पात्र भटकै

जिला चित्रकूट, ब्लाक कर्वी, बेड़ीपुलिया अउर कल्ला गांव का चकला पुरवा। हिंया के मड़इन का आरोप हवै कि उनका राष्ट्रीय खाद्य सुरक्षा अधिनियम के तहत राशन कार्ड नहीं बना आय। यहिसे उंई कर्वी एस.डी.एम. रजनीश कुमार मिश्र का 18 जनवरी का लिखित दरखास दें आय रहै, पै एस.डी.एम. नहीं मिले। यहिसे उंई बिना दरखास दें अपने घर लउट गें।
बेड़ीपुलिया के संता अउर चकला पुरवा के रामप्रसाद अउर हिरिया का कहब हवै कि हम पात्र मड़ई आहिन, पै राष्ट्रीय खाद्य सुरक्षा के तहत राशन कार्ड नहीं बना आय। रोजे मजूरी कइके अपने परिवार वालेन का पेट भरित हन। अगर एक दिन मजूरी न करी तौ दुसरे दिन घर मा चूल्हा नहीं जलत आय। गांव मा अउर मड़इन के राशन कार्ड बन गें हवैं, पै हम लोगन का अबै तक नहीं बना आय।
जिला पूर्ति विभाग के बाबू अवधेश सिंह का कहब हवै कि मड़ई फार्म भर के विभाग मा जमा करै। उनका राशन कार्ड बनवा दीन जई।