अनशन करे बाद भी नई होत सुनवाई

 लालचन्द्र परिवार के साथे
लालचन्द्र परिवार के साथे

जिला महोबा, ब्लाक कबरई, कस्बा कबरई, विशाल नगर, वार्ड नम्बर एक। एते को लाल चन्द्र परिवार के साथे 5 दिसम्बर 2013 से कचहरी में जुग्गन के खिलाफ धरना धरे बेठो हे। ईखी जानकारी महोबा के सब अधिकारी ओर बांदा डी.आई.जी. खा हे। पे अभे तक कोनऊ भरोसा देय नई आओ हे।
लालचन्द्र के साथे ऊखे परिवार ने बताओ कि हमाई ऊ जमीन पुरखो की आय। अभे तक हम ऊ जमीन में खेत जोतत बोउत हते। ई साल हम दिल्ली चले गये हते। जीसे प्रधान जागेश्वर हमाई जमीन में कब्जा करे हे, ओर एक महीना पेहले कमरा को समान निकार के फेंक दओ हे। हमने मना करी तो ऊ गाली देन लगो ओर लाठी डण्डा से मारो हतो। ईखी रिपोर्ट हमने दिसम्बर में कबरई थाना में लिखाई हती, पे कछू सुनवाई नई भई हे। जुग्गन हमें धमकी देत हे कि अगर कोनऊ कार्यवाही करे की कोशिश करो तो जान से मार देहो। जीसे हम अनशन करे खा मजबूर हे। अनशन करें से पेहले हमनें महोबा डी.एम. ओर बांदा डी.आई.जी. खा पार्थना पत्रा भेजो हतो। पे अभे तक कोनऊ अधिकारी नई आओ हे। हमाई गरीब ओर दलितन की कहंू सुनवाई नई होत हे। अगर हमाई सुनवाई न हो हे, तो हम आमरण अनशन करें खा मजबूर हो जेहंे।
जुग्गन घर में बात करें की कोशिश करी, पे परिवार में कोनऊ नई मिल पाओ हे। जीसे बात नई हो पाई हे।
कबरई थाना के एस.ओ. ने बताओ कि हमाये एते कोनऊ रिर्पोट लिखाउन नई आओ हे। ऊखो जमीनी विवाद होंय के कारन एस.डी.एम. सत्यप्रकाश राय जांच करत हंे।