अधूरा उप स्वास्थ्य केन्द्र

कबै चालू होइ उप स्वास्थ्य केन्द्र
कबै चालू होइ उप स्वास्थ्य केन्द्र

जिला चित्रकूट, ब्लाक मानिकपुर, गांव धान, पुरवा बरहट। हिंया छह साल से उप स्वास्थ्य केन्द्र बनत रहै अबै तक वा बन के तैयार नहीं भा आय। गांव के मड़इन का दवाई करावै खातिर मानिकपुर बीस किलो मीटर अउर कर्वी लगभग पच्चीस किलो मीटर आवंै का परत हवै।
धान गांव के सुनीता देवी अउर सुशीला का कहब हवै कि इलाज करावैं मानिकपुर सामुदायिक स्वास्थ्य केन्द्र किराया लगा के जइत हन। पुरवा मा उप स्वास्थ्य केन्द्र अधूरा हवै। अगर बन के तैयार होइ जाये तौ आराम होइ जाये। काहे से रात बिरात मरीजन का लइके जाये मा परेशानी झेलैं का परत हवै।
मगरहाई पुरवा के सुन्दरलाल ममता अउर दशोदा का कहब हवै कि उप स्वास्थ्य केन्द्र पूर्व प्रधान देवेन्द्र बनवावत रहै, पै अबै तक नहीं बना। सोंचत रहेन कि अगर उप स्वास्थ्य केन्द्र बन जई तौ अब इलाज करावैं खातिर अउर मेहरियन का बच्चा पैदा करावै के सुविधा होइ। केन्द्र बन जाये से मानिकपुर, कर्वी न जाये का परी।
पूर्व प्रधान देवेन्द्र कहिस कि केन्द्र बनवावैं खातिर सात लाख पन्द्रह हजार रूपिया का बजट आवा रहै तौ बनवा दीन गा हवै। चुनाव होय के बाद रूपिया वर्तमान प्रधान निर्मला देवी के खाता मा पहुंच गा।
प्रधान निर्मला देवी के मनसवा सुधीर कहिस कि केन्द्र बनवावैं खातिर सी.एम.ओ. का दरखास 15 अक्टूबर का दीने हौं।
सी.एम.ओ. वेद प्रकाश कहिन कि नवम्बर 2014 तक बजट आवैं वाला हवै तौ उप स्वास्थ्य केन्द्र बनवावा जई।