अकेले जान के करी मारपीट, गाली गलौज

18-09-14 Mahoba Mahila Mudda for webजिला महोबा, ब्लाक कबरई, गांव पहरा। एते 13 सितम्बर 2014 खा उर्मिला ओर कल्लू पुत्र मथुरा की लड़ाई भई हे। जीखी रिपोर्ट उर्मिला ने कबरई थाना में करी हे।
उर्मिला ने बताओ कि कल्लू हमाये चाचा ससुर को लड़का आय। ऊ हमाये घरे आउत हतो। 13 सितम्बर खा कल्लू की ओरत मोये गाली गलौज करत हती। 13 सितम्बर खा 11 बजे कल्लू घरे आओ तो मेने घरे आयें से मना कर दओ। मोये घर में कोनऊ न हतो। कल्लू मोये अकेले जान के लात घूसा से मारन लगो। मोये गले में सूजन ओर भीतर चोट हे। मेने कबरई थाना में कल्लू के नाम रिपोर्ट लिखाई हे।
कल्लू ने कहो कि मेने नई मारो हे। ऊ आपस में लड़ी हे। उर्मिला मारे को मोओ झूठो आरोप लगाउत हे।
कबरई थाना के एस.आई. रमेश सिंह चैहान ने बताओ कि दोनऊ पक्ष खा बुला के समझौता करा दओ हे।
एसई ब्लाक चरखारी, गांव बरांय एते की रामकली के साथे गांव के फुल्लू ने 15 सितम्बर 2014 खा गाली गलौज करी हे। ईखी दरखास रामकली ने खरेला थाना मे दई हे।
रामकली ने बताओ कि फुल्लू, वीर नारायण, सुरजन ओर शिवराम यादव मोये आदमी बाबू खा बुला के जुआ खेलाउत हते। बाबू जुआं मे सब कछू हार गओ ओर कर्जा होंय के करन घर छोड़ के भाग गओ। 15 सितम्बर खा फुल्लू मोये घरे आओ ओर कहन लगो की जोन तोये आदमी ने रूपइया लये हें ऊ दे। मेने कहो की में मुश्किल से अपने बच्चा पालत हों कर्जा किते से देहों। फुल्लू मोये गाली देन लगो ओर धमकी दई की रूपइया न देहे तो तोये घर में तारा डार देहों ओर तोये जान से मार देहों। एई से मेने 15 सितम्बर 2014 खा खरेला थाना मे रिपोर्ट करी हे। खरेला थाना के मुन्शी राजकिशो सिंह सेंगर ने कहो कि ओते सिपाही खा भेज के जांच कराई जेहे। दोनऊ पक्ष खा बुला के समझौता करा दओ जेहे।