अंधियारे मा रहत मड़ई

taza banda

जिला बांदा, ब्लाक बड़ोखर खुर्द, गांव तिन्दवारा अउर बबेरू का गांव पड़री। इं दूनौ गांवन मा बिजली के समस्या है। कतौ खम्भा टूट है तौ कतौ-कतौ देखै भर का तार अउर खम्भा लाग हैं। तिन्दवारा गांव के राजाराम, पप्पू, सुरेन्द्र अउर राम गोपाल कहिन कि हमरे हेंया मेन रोड मा लाग बिजली का खम्भा 9 मार्च 2013 का ट्रक के टक्कर लागै से टूट गा रहै जेहिसे बिजली नहीं आवत आय। बच्चन के पढ़ाई का नुकसान होत है। काहे से या समय बच्चन के पेपर चलत है। अगर डेब्बी के उजेला मा पढ़त हैं तौ मुश्किल परत है। यहिके खातिर बिजली विभाग मा दरखास दीन है, पै कउनौ सुनाई निहाय।
खुरहण्ड पावर हाउस के जेई आर.के. वर्मा का कहब है कि बिजली का खम्भा ठाड करा दीन गा है। 19 मार्च 2013 का शाम चार बजे से पावर सप्लाई करा दीन गा है।
यहिनतान बबेरू ब्लाक के गांव पड़री मा रहैं वाले नरेन्द्र, रामप्रकाश, अउर रामबली कहिन कि हमरे हेंया चार साल से तार अउर खम्भा लाग हैं। चार हजार के आबादी है, पै गांव मा टाªस्फारमर नहीं धरा आय। जेहिसे गांव मा अंधेरा रहत है, पै तार अउर खम्भा गांव के शोभा बढ़ावै भर का लाग हैं। यहिसे हम सोचत हन कि गांव मा बिजली आ जाय तौ नींक है। दूसर बात या समय गर्मी भी आवत है तौ मच्छर बहुतै लगिहैं । यहिसे हम बिजली विभाग का दरखास दीन है, फिरौ कउनौ सुनाई निहाय। सिमौनी पावर हाउस का जेई धीरज भास्कर बताइन कि गांव मा बिजली जलावै वाले कनेक्शन निहाय। यहिसे ट्रास्फारमर नहीं धरा आय। यहिके खातिर गांव के मड़ई कनेक्शन लई लें तबै ट्रास्फारमर धरा जई ।